John Lloyd at Angelica magkahiwalay na naglakad sa red carpet ng 6th Star Magic Ball

Bukod pa sa magagarang mga gown at suit na sinusuot ng mga artistang dumadalo sa taunang Star Magic Ball, inaabangan din ng marami kung sinong mga aktor at aktres ang dumadalo bilang magkapareha.

Sa ika-anim na Star Magic Ball na naganap kagabi, Sabado, Setyembre 1, sa Makati Shangri-La Hotel, masasabing ang pinaka-inabangan ay ang pagdalo nina John Lloyd Cruz at Angelica Panganiban bilang date ng isa’t isa.

Mainit kasi ang usap-usapan nitong nakalipas na tatlong buwan na mayroon na diumanong nagaganap na romansa sa pagitan ng dalawa.  Ito ay matapos mag-break nina John Lloyd at Shaina Magdayao sa isang banda, at nina Angelica at Derek Ramsay sa ibang banda.

Ibinalita ng PEP. ph (Philippine Entertainment Portal) ang diumano'y panaka-nakang sighting kay John Lloyd sa building sa Quezon City kung saan may condominium si Angelica, ng bandang Hunyo. (CLICK HERE to read related story.)

Ilang linggo naman ang nakalipas, kumalat sa blogs at news websites ang isang litratong nai-post sa Instagram account ni Angelica noong Agosto 12, Linggo.

Sa nasabing litrato, magkasama sina John Lloyd at ang aktres. May caption na “Perfect Sunday” at “according to the guy in pink” ang litrato.

Makikita rin sa litrato na ang tinutukoy na "guy in pink" ay si John Lloyd na nakasuot ng pink na polo shirt. (CLICK HERE to read related story.)

Sa isang press conference nung Agosto 26, anim na araw bago ang 6th Star Magic Ball, inamin ni John Lloyd na siya ang nag-post ng pinag-uusapang Instagram photo nila ni Angelica.

“This isn't the right place, the right time to talk about it. Some other time, maybe,” nga lamang ang ipinakiusap ni John Lloyd sa mga miyembro ng press na gustong buksan ang issue. (CLICK HERE to read related story.)

RED CARPET. Sa paglakad nina John Lloyd at Angelica sa red carpet ng 6th Star Magic Ball kagabi, mapapansing mga dalawang tao lamang ang layo nila sa isa’t isa.

Nauna si John Lloyd sa aktres at nagmamadaling nilaktawan ang mga miyembro ng press na naghihintay na ma-interview siya.

Samantala, naging mailap din si Angelica sa mga interview.

Nakasuot ng itim na gown na gawa ng Lebanese fashion designer na si Elie Saab, ngumiti lamang ang aktres habang sumagot ng mangilan-ngilang salita sa mga tanong ng press.

What are you looking forward to tonight? Sagot ng Here Comes the Bride star: “Mag-enjoy.”Nang tanungin pa kung sino sa mga kaibigan niya sa Star Magic ang gusto niyang maka-bonding sa gabing iyon, tugon ni Angelica: “Wala naman, kasi lagi ko namang kasama yung mga friends ko.”

Noong nakaraang taon, sa ika-limang Star Magic Ball, parehong may ka-date pang iba sina Angelica at John Lloyd.

Kasama noon ni John Lloyd ang ex-girlfriend na ngayong si Shaina Magdayao at si Angelica naman ay ang ex-boyfriend na nitong si Derek Ramsay.

Talent na ngayon ng TV5 si Derek, habang si Shaina naman ay solo ring dumating sa pagdiriwang.

Samantala, ayon sa isang guest na naroon, nang nasa loob na ng dining hall, malinaw na sina John Lloyd at Angelica ang magka-date.

Teorya ng guest, iniwasan lang marahil ng dalawa na makitang magkasama sa red carpet dahil doon nakapuwesto ang mga reporters at photographers.

Marami namang guests ang nakakita na magkahawa-kamay na lumabas ng Rizal Ballroom sina John Lloyd at Angelica pagkatapos ng pagdiriwang.