Dennis trillo Sinagot ang kanyang anak kung bakit ang dami nitong Tita

Maraming nangyayari kay Dennis Trillo ngayon.

Bago ang gala night ng Ang Katiwala—ang indie film na pinagbibidahan niya, sa ilalim ng direksiyon ni Aloy Adlawan—sa Hulyo 25, sa Cultural Center of the Philippines (CCP), ay nagpunta muna si Dennis sa Dubai.

May show doon si Dennis, at first time raw niya sa Dubai.

Ngunit higit pa roon kung bakit excited ang magaling na aktor noong makausap siya ng PEP.ph (Philippine Entertainment Portal). Pagkakataon din daw kasi niya yun upang magkita sila ng kapatid, na nagtatrabaho sa Etihad Airlines sa Dubai bilang flight attendant.

Pagbalik niya ng Pilipinas, naka-on-call naman daw siya sa panibagong indie film, ang Sapi, this time under Direk Brillante Mendoza.

“Yun, medyo mahirap, kasi talagang yung gagawin namin, totoong nangyayari na exorcism.

"Parang may mga nakausap naman na yata sila, so naka-on-call kami for that.

"Nakakatakot—pero sabi naman, magsisimba, magpi-pray bago namin gawin.”

Ang maidirek ng isang Brillante Mendoza—ang bukod-tanging Filipino director na nahirang na Best Director sa Cannes Film Festival—ang isang malaking dahilan kung bakit napapayag si Dennis na gawin ang Sapi.

BIANCA KING. Samantala, malinaw na may lovelife si Dennis ngayon.

Habang kausap namin siya noong nakaraang linggo sa Annabelle’s restaurant, sa Timog, QC, ang girlfriend niyang si Bianca King, isa ring GMA Network talent, ay nasa Canada at nagbabakasyon.

Nasa Canada ang buong pamilya ni Bianca, at mag-isa siya rito sa nabiling condo.

Nang kamustahin ng PEP ang relasyon nila, sinabi ni Dennis na mas okay sila.

“Okay kami, tahimik, mas relax, mas hindi controversial,” nakangiti niyang sabi.

Dugtong pa ng aktor, na hindi naging maayos ang pakikipaghiwalay sa ex-girlfriend na si Jennylyn Mercado: “Yung last ko na public na open relationship, tulad nga ng sinabi ko, medyo hindi maganda ang mga nangyari.

"Ngayon, mas pinili ko naman na tahimik na lang.”

CALIX ANDREAS. Pagdating naman sa kanyang anak sa dating girlfriend na si Carlene Aguilar, si Calix, ipinagmamalaki ni Dennis ito.

Si Calix ay nag-aaral na raw sa big school at marunong nang kumanta ng Chinese song.

Dahil sina Dennis ay Filipino-Chinese, di kataka-takang sa isang Chinese school nito pinag-aaral si Calix.

Naitanong namin kay Dennis ang sinabi ni Carlene noon na matalino ang anak nila at maraming tanong.

Isa raw sa tanong nito ay ‘why do I have so many Tita?’ at kung bakit raw kapag ito ang pumupunta sa daddy niya, si mommy niya raw, hindi?

Nakangiting sabi naman ni Dennis, “Matalino talaga siya. Pero ako naman, hindi pa niya ako tinatanong.”

Paano kung tanungin siya ng anak?

“If ever na tanungin, mag-iisip ako kung ano ang isasagot ko para hindi siya mabigla.

"Pero base sa character niya, ano naman, e, matalino siya, madali siyang makapag-absorb ng information. Para siyang matandang mag-isip.

“Sa tingin ko, kung sakaling dumating sa kanya ang panahon, mai-explain ko sa kanya yun.”

Paano nga kung tanungin na siya nito ng kung bakit siya maraming Tita?

Nakangiting sagot ni Dennis, “Siguro sasabihin ko na lang na 'because your Dad is a loving person.'”

Magpa-five years old na raw si Calix sa September.