Abot-abot ang kantiyaw kay Derrick Monasterio nang makausap ito ng PEP.ph (Philippine Entertainment Portal) sa press conference ng Book 2 ng Luna Blanca.
Hindi pa rin kasi nakakalimutan ng ilang entertainment press, kabilang na ang PEP, na noon ay tila si Bea Binene ang pinopormahan niya.
Kaya ang pambungad na tanong sa kanya, bilang si Barbie Forteza ang bago niyang ka-loveteam: kung may choice ba siya ay posible kayang si Bea ang mas pipiliin niya?
Sagot ng binata, “Ito, totoo 'to, ha. Kung nagkataong pinapili ako, ang pipiliin ko talaga, si Barbie.”
Pero hindi agad pinaniwalaan ang sagot ni Derrick at may nagbiro pang "showbiz" daw ang sagot niya.
Paliwanag ni Derrick, “Hindi, kasi naman, nakatrabaho ko na si Bea. Si Barbie, hindi pa.
"Habang break naman namin, nag-uusap naman kami ni Barbie, nagkakakilala kami. Maganda po yung ganoon. “
Nagpaalam muna ba siya kay Joshua Dionisio, na orihinal na ka-loveteam ni Barbie?
“Wala po, hindi po. Hindi pa kami nagkikita,” sagot ni Derrick.
Napansin namin na kahit sa Twitter, sina Barbie at Derrick na ang madalas magka-tweet ngayon.
Ibig bang sabihin nito, ang atensiyon ni Derrick ngayon ay na kay Barbie at wala na kay Bea?
|
"Grabe naman, naha-hot seat ako!” natatawang sagot ni Derrick.
Pero, ganoon nga ba?
“Opo,” pag-amin niya.
Puwedeng sabihin na nag-switch lang ng ka-loveteam, naiba na rin ang pinag-ukulan ng atensiyon?
“Hindi naman po, nagkatrabaho kami dati, pero yun na yun. Work lang.
“Siyempre, loveteam kami dati, kailangan lagyan ng kilig.”
Dahil lang pala sa loveteam ang mga sweetness niya noon kay Bea?
“Siguro po, sabihin natin na for a while, nagustuhan ko rin si Bea.
"At siguro po, sabihin na lang natin na sa ngayon, mas masaya ako na ka-loveteam ko si Barbie ngayon.
"At siguro, iba rin yung... kapag nakikita niyo si Barbie sa TV, mas iba siya sa totoong buhay. Mas kalog 'yang taong 'yan.
“Parang ako siya na naging babae, ako yung bersiyon niya.”
Nawala na ba yung closeness nila ni Bea?
"Opo, masasabi ko na medyo hindi na po kami ganoong nag-uusap tulad ng dati," pag-amin ni Derrick.
LEADING MAN. Naiba naman ang ngiti ni Derrick nang sabihin naming sa wakas ay nabigyan na siya ng pagkakataong maging leading man sa primetime.
“Of course, masaya ko,” sabi niya.
Nararamdaman ba niyang simula na ito ng pag-angat nila ni Kristoffer Martin, na kapareha naman ni Bea sa Luna Blanca? Na sila na ang ipu-push ng network?
“Sana po, sana…kasi, 'binibigay naman po namin ang effort namin sa lahat ng ginagawa. Best effort pong talaga.”
Yun nga lang, tila ngayong sila ni Kristoffer ang nabibigyan ng pansin, tila si Joshua naman ang nawawala?
Sagot ni Derrick, “Si Joshua po, siguro may ibang plano naman po sa kanya kaya po siguro medyo nagpapahinga naman siya.
"Siguro, there’s something big na darating. Hindi ko rin po alam.”
FROM JOSHBIE TO DERBIE. Wala pa bang nagagalit sa kanyang mga JoshBie—Joshua-Barbie—fans?
“Sa ngayon, wala pa po. Pero, ready na po ako do’n.”
Anong gagawin niya kapag may nang-away sa kanya?
“Hindi ko pa rin po alam.”
At saka niya sinabi, “Gagawa po kami ng sariling loveteam ni Barbie—DerBie po!
"Kasi, noong The Road po, may mga scenes po kami do’n. Nabansagan na rin namin ang loveteam namin na DerBie po, dati pa lang.”
Posible kaya na tulad noong kay Bea, magparamdam din siya kay Barbie?
“Why not? Yun naman po ang first step sa isang relationship, magpapakilala muna.”
Posible niyang ligawan ang bagong kapareha?
“Puwede po, kapag nasa tamang age na si Barbie.
"Actually, sabay nga po ang birthday namin. July 31 siya, August 1 naman ako. Pagkagising niya, birthday ko na.
"Pero sa ngayon, career muna.”
YOUTH AMBASSADOR. Samantala, masaya si Derrick dahil siya ang napili ng National Youth Commission na maging Youth Ambassador.
Ayon kay Derrick, “Ako po ang napili na maging youth ambassador. Parang maging good example po sa mga kabataan.
“Siyempre po, para sa akin, magandang achievement po yun na mapili nila, dahil marami rin po ngayon na mga kabataang artista, pero isa po ako sa napili nila.”
No comments:
Post a Comment